លោកអ្នកអាចជូនដំណឹងអំពីការទាមទារសំណងតាមរយៈការទំនាក់ទំនងលេខទូរសព្ទផ្នែកដោះស្រាយសំណង២៤ម៉ោង ការផ្ញើសារតាមប្រព័ន្ធអេឡិចត្រូនិក ការជួបផ្ទាល់នៅការិយាល័យរបស់ប្រូសួរ ឬ ទាក់ទងភ្នាក់ងារស្របច្បាប់របស់ប្រូសួរ។ សម្រាប់ព័ត៌មានលម្អិត សូមលោកអ្នកមើលផ្នែក “តើត្រូវធ្វើដូចម្តេចដើម្បីទាមទារសំណង” ។

ការជូនដំណឹងអំពីការទាមទារសំណងត្រូវតែធ្វើឡើងភ្លាមៗបន្ទាប់ពីគ្រោះថ្នាក់/ហេតុការណ៍កើតឡើង។ ការពន្យារពេលការជូនដំណឹងអំពីការទាមទារសំណងអាចនឹងប៉ះពាល់ដល់ការទាមទារសំណងរបស់លោកអ្នក។ សូមលោកអ្នកត្រួតពិនិត្យបណ្ណសន្យារ៉ាប់រងរបស់លោកអ្នកសម្រាប់រយៈពេលជាក់លាក់ក្នុងការជូនដំណឹងអំពីការទាមទារសំណង។

រយៈពេលដំណើរការការទាមទារសំណងអាស្រ័យលើប្រភេទ និងភាពស្មុគស្មាញនៃសំណង។ ទោះបីជាយ៉ាងណា លោកអ្នកនឹងត្រូវបានជូនដំណឹងអំពីការសម្រេចផ្តល់សំណង ឬការបដិសេធសំណងក្នុងរយៈពេល ១៥ថ្ងៃ នៃថ្ងៃធ្វើការ បន្ទាប់ពីប្រូសួរទទួលបានឯកសារតម្រូវគ្រប់គ្រាន់។

នៅពេលការទាមទារសំណងត្រូវបានអនុម័ត ហើយលោកអ្នកទទួលយកការសម្រេចផ្តល់សំណង ការទូទាត់សំណងនឹងត្រូវបានធ្វើឡើងតាមរយៈការទូទាត់ដោយមូលប្បទានបត្រ គណនីធនាគារ ឬសាច់ប្រាក់ ស្របតាមការជ្រើសរើសរបស់លោកអ្នក និងប្រភេទសំណង។ សម្រាប់ការទាមទារសំណងពាក់ព័ន្ធនឹងការជួសជុលនៅយានដ្ឋានដៃគូ ឬការព្យាបាលនៅមន្ទីរពេទ្យដៃគូ ការទូទាត់សំណងនឹងត្រូវបានធ្វើឡើងដោយផ្ទាល់ជាមួយដៃគូសហការរបស់ប្រូសួរ។